spyri-museum.ch

Exposiziun

Sfegliai en ils cudeschs da Johanna Spyri, faschai part d’ina lecziun da scola a Hirzel enturn l’onn 1840, tadlai la conversaziun da l’autura che baiva tè cun ses figl Bernhard u as faschai in’invista dal process da lavur da Johanna vi da sia scrivania. Explorai objects originals e reproducziuns da brevs e manuscrits entamez las inscenaziuns atmosfericas.

Istorgia dal museum

Il Museum da Johanna Spyri è vegnì fundà l’onn 1981 dal scolast Jürg Winkler. En occasiun da l’80avel di da la mort da la scriptura èsi stà evident da stgaffir en si’onur in lieu, nua ch’ins pudeva preschentar commensuradamain sia persunalitad e sias ovras. Hanni Heusser, uschia sa numnava Johanna Spyri durant sia uffanza, è naschida l’onn 1827 en la chasa dal medi sin il Hirzel ed ha frequentà l’instrucziun en la veglia chasa da scola dal vitg ch’è oz il museum. Johanna scriva pli tard davart ses temp da scola: «Questa chasa veglia era la chasa da scola, nua che jau hai retschavì l’emprima instrucziun. Questa n’era betg concepida uschia ch’i vegniva dà a nus quai che nus duvravan, ma plitost uschia che nus pudevan prender quai che nus vulevan. …»
La vischnanca da Hirzel ha finanzià il tschains da locaziun, e grazia ad in sponsoring regiunal han ins pudì cuvrir ils custs dal persunal e da las acquisiziuns materialas.

Qua pendevan pli baud maletgs da la famiglia da Johanna, sut la stgala sa chattava in pitschen mund alpin concepì plain premura, sco ch’el è vegnì descrit en l’istorgia da «Heidi». Era la sutga cun rodas – in original da la famiglia – ed ina gronda chaldera d’arom ord la cuschina da la chasa dal medi eran exponidas qua. Sin il plaun sura sa chattavan vitrinas cun da tuttas sorts objects e documents da las famiglias Heusser e Spyri sco era la mobiglia veglia cun truclets («Windellade»). Pli tard han ins installà in indriz da video, sin il qual ins ha pudì guardar il film classic da «Heidi» cun Heinrich Gretler ed Elsbeth Sigmund en las rollas principalas, e quai en plirs linguatgs. Quest film era adattà ordvart bain per ils numerus giasts dal Giapun, da la China, la Germania e l’USA. Ultra da quai hai era dà festivitads en il Hirzel ch’eran deditgadas per exempel al 100avel di da la mort da Johanna Spyri (2001) u a l’existenza da 25 onns dal museum (2006).

Dal 2014 ha gì lieu l’emprima notg da museum a Hirzel. Suenter ina nova concepziun cumplessiva ha il museum puspè avert sias portas a la fin da matg  2016. La scenografa ha mess il focus pli ferm sin la persuna da Johanna Spyri che sin la figura da Heidi. Il nov concept d’exposiziun pussibilitescha als giasts da far in viadi en il temp da la vita e dal mund da Johanna Spyri: elements biografics vegnan integrads en fatgs politics, socials ed economics dal 19. tschientaner, uschia che las visitadras ed ils visitaders experimentschan la vita da Johanna Spyri en maniera impressiunanta. Cun la nova pagina-web ch’è vegnida messa en la rait l’atun 2020 ha il museum chattà definitivamain sia via en il 21. tschientaner.

In vitg raquinta istorgia

«La bellezza da la cuntrada è nossa pli gronda ritgezza …», scriva Jürg Winkler en ses cudesch «Der Hirzel, Bild einer Gemeinde». As laschai persvader da quai en occasiun da Vossa visita a Hirzel. Faschai ina spassegiada enturn il santeri. Guardai en il lontan davent dal banc situà sut il grond fau. Giudai la calma e la segirezza che Johanna Spyri ha dastgà passentar durant il temp da sia uffanza e giuventetgna en quest ambient magnific. Qua è vegnì furmà ses caracter en maniera decisiva.

La chasa ch’è oz il Museum da Johanna Spyri era pli baud la chasa da scola.

Sche Vus avais anc in pau temp, lura spassegiai vers ensi sin la vietta stippa, la «Toktergass», sper la baselgia; Vus arrivais sin la «Vordere Höchi» tar la chasa da naschientscha da Johanna Spyri. Là giais Vus a sanestra e giudais la curta muntada divertaivla tras il fitg bel parc d’animals pitschens en il guaudet da Spyri. Sper ina plazza da gieu en il guaud chattais Vus là sin in bloc erratic la tavla commemorativa da Johanna Spyri e da sia mamma Meta Heusser.

Tgi che chamina cun egls averts sin las sendas bain marcadas en ils conturns dal Hirzel vesa il maletg particular da nossa cuntrada: a l’orizont lontan las collinas verdas e plaschaivlamain radundas (Drumlins), curunadas da tigls marcants.

Dapi il 1983 è la bellezza dal Hirzel registrada en l’inventari federal da las cuntradas e dals monuments natirals d’impurtanza naziunala sco cuntrada da morena grondiusa da la Svizra.

Ulteriura litteratura tar l’istorgia dal vitg da Hirzel chattais Vus qua:

• Jöri Bernhard: Hirzel. Dorf im Wandel, Hirzel 2017
• Jürg Winkler: Der Hirzel, Bild einer Gemeinde, Hirzel 1989

Butietta dal museum

Ina butia pitschna ma preziusa envida a svutrar e fufragnar – cun cartas postalas, segns da cudeschs, artitgels da reclama e cun ina schelta da cudeschs exausts da Johanna Spyri.

Nus avrin noss museum era per Vus!

Uras d’avertura extraordinarias:

Visitas dal museum ordaifer las uras d’avertura regularas: ca. 1 ura, fin a 10 persunas e senza guid: CHF 150.–, tut las ulteriuras persunas: CHF 10.–. Il pretsch d’entrada è mintgamai cumprais.

Visitas guidadas

Vulessas Vus visitar noss museum ordaifer las uras d’avertura cun Vossa famiglia, Voss amis e Vossas amias, Voss enconuschents, collegas da lavur u cun Vossa classa? Gugent organisain nus per Vus ina visita guidada individuala. Per plaschair faschai diever dal formular sutvart per l’emprim contact, uschia che nus as pudain contactar per la planisaziun.

Visitas guidadas standard:

ca. 1 ½ ura incl. entrada.

• fin a 10 persunas: CHF 250.–
• 11 fin 20 persunas: CHF 350.–
• a partir da 20 persunas en duas gruppas (duas visitas guidadas): CHF 500.–
• gruppas pli grondas: sin dumonda
• classas da scola: CHF 250.– incl. entrada
• scolas da Horgen: gratuit 

Uras d’avertura extraordinarias:

Visitas dal museum ordaifer las uras d’avertura regularas: ca. 1 ura, fin a 10 persunas e senza guid: CHF 150.–, tut las ulteriuras persunas: CHF 10.–. Il pretsch d’entrada è mintgamai cumprais.